Ўзбекистон Киберхавфсизлик маркази ходимларининг шахсий маълумотлари ўғирландими?

Кибержиноятчилар ва хакерлар ўғирлаган маълумотларини сотадиган сайтда Ўзбекистон Киберхавфсизлик марказининг 100 нафар ходимига тегишли шахсий маълумотлар эълон қилинди.

 

 

Номаълум хакер маълумотларни марказнинг ички базасидан олганини, унинг қўлида бундан ҳам муҳимроқ маълумотлар борлигини айтган. Уларнинг эълон қилинишини тўхтатиш эвазига 200 000 минг доллар талаб қилган.

 

Ушбу ҳолат юзасидан Киберхавфсизлик маркази расмий муносабат билдирди.

 

Қайд этилишича, ўтказилган дастлабки ўрганишлар натижасига кўра, мазкур тарқатилаётган маълумотлар ҳақиқатга мос келмайди ва марказ ички ахборот тизимлари бузилмаган ва бундай турдаги маълумотлар базасидан фойдаланилмайди.

 

Шунингдек, марказ хабарида  “Ахборотлаштириш тўғрисида”ги қонуннинг 12-1 моддаси 2-қисми эслатиб ўтилган. 

 

Қонунга мувофиқ, веб-сайтнинг ёки интернет саҳифасининг эгаси, шу жумладан блогер ҳамма эркин фойдаланиши мумкин бўлган ахборот жойлаштириладиган Интернет жаҳон ахборот тармоғидаги ўз веб-сайтига ёки интернет саҳифасига ҳамма эркин фойдаланиши мумкин бўлган ахборотни жойлаштиришдан аввал унинг тўғрилигини текшириши, шунингдек, жойлаштирилган ахборотнинг нотўғрилиги аниқланган тақдирда уни дарҳол ўчириб ташлаши шарт.

 

Аввал ҳам 2026-йил февралда ҳукумат тизимларидан камида 15 миллион Ўзбекистон фуқаросининг шахсий маълумотлари сиздирилиб, Дарк Wебъга жойлаштирилгани ҳақида хабар берилганди. Ҳолат юзасидан Киберхавфсизлик маркази ДУК ўрганишлар олиб борилаётганини ва кейинроқ қўшимча маълумот тақдим этилишини маълум қилган.

 

Ўша пайтда Рақамли технологиялар вазири Шерзод Шерматов 15 миллион фуқаронинг маълумоти интернетда сотилиш ҳолати йўқлигини айтган.