Москвада 9 май арафасида мобил алоқа чекланади
SMS юбориш хизматлари ва ҳатто чекловлар вақтида ишлаши керак бўлган махсус интернет ресурслар фаолияти ҳам тўхтатилиши мумкин.
Москвада 9 май куни ўтказиладиган ҳарбий парад арафасида мобил алоқа ва интернет хизматларига кенг кўламли чекловлар жорий этилиши кутилмоқда. Бу ҳақда BBC манбаларга таяниб хабар берди.
Маълум қилинишича, Россия пойтахтида 5, 7 ва 9 май кунлари мобил алоқа тўлиқ чекланади. Шунингдек, SMS юбориш хизматлари ва ҳатто чекловлар вақтида ишлаши керак бўлган махсус “оқ рўйхат”даги интернет ресурслар фаолияти ҳам тўхтатилиши мумкин.
Манбалар чекловлар фақат шаҳар марказида эмас, балки Москва шаҳрини айланиб ўтадиган йирик ҳалқа автомобиль йўли (МКАД) ҳудуди доирасида ҳам амал қилишини билдирган.
Аввалроқ, март ойи бошидан Москва марказида мобил интернет мунтазам узиб қўйилгани кузатилган. Натижада навигация тизимлари, тўлов терминаллари ва айрим хизматлар ишламай қолган. Интернет таъминоти 24 март куни ҳеч қандай расмий изоҳсиз тикланган.
Кейинроқ Россия Президенти Владимир Путин интернет узилишларини хавфсизлик масалалари билан боғлиқлигини билдирган.
Шу билан бирга, Россия Мудофаа вазирлиги 9 май куни Қизил майдонда ўтказиладиган парад дастури ўзгартирилганини маълум қилди. Унга кўра, 2007 йилдан бери илк бор ҳарбий техника колоннаси иштирок этмайди. Кремль эса тадбир “қисқартирилган форматда” ўтишини, бунга хавфсизлик билан боғлиқ омиллар ва сана юбилей эмаслиги сабаб бўлаётганини билдирган.
