Ўзбекистонда подъезд ва тротуарлар олдига машина қўйиш тақиқланди
Кўп қаватли уйлар ҳудудида янги тақиқлар жорий этилди.
Кўп квартирали уйлар ҳудудида хавфсизлик, тартиб-интизом ва умумий фойдаланиш жойларини сақлашни таъминлаш мақсадида янги талаб ва тақиқлар жорий этилди. Бу ҳақда Адлия вазирлиги маълум қилди.
Унга кўра, кўп квартирали уйлар ва уларга туташ ҳудудларда фуқаролар томонидан айрим ҳаракатларни амалга ошириш қатъиян тақиқланади.
Хусусан, уй ҳайвонларини умумий фойдаланишдаги зинапоялар, подъездлар, том, ертўла, умумий фойдаланишдаги ошхона ҳамда балкон ва лоджияларда сақлашга рухсат этилмайди.
Шунингдек, балкон ва лоджияларда ёнғин хавфини келтириб чиқарувчи жиҳозлар ўрнатиш, оғир буюмларни сақлаш ҳамда фасад қисмида кийим-кечак, гилам ва бошқа буюмларни осиб қўйиш тақиқланади.
Бундан ташқари, кириш йўлаклари ва зинапоялар остида ёнувчан материалларни сақлаш, умумий иссиқлик тизимларига ўзбошимчалик билан ўзгартириш киритиш, қўшимча иситиш мосламаларини улаш ҳам қатъиян ман этилади.
Яна бир муҳим тартибга кўра, кўп квартирали уйлар ва уларга туташ ҳудудларда автотранспорт воситаларини газонлар, хиёбонлар, болалар майдончалари, тротуарлар ҳамда кириш йўлаклари олдига қўйиш тақиқланади.
