“Электрон рецепт” тизими бекор қилинмайди — ССВ
Ижтимоий тармоқларда мазкур тизим бекор қилиниши юзасидан тарқалган хабарларга ойдинлик киритилди.
Ижтимоий тармоқларда “Электрон рецепт” тизими бекор қилинди” мазмунида хабарлар тарқалмоқда. Мазкур ҳолатга расмий муносабат билдирилди.
Қайд этилишича, ушбу хабарларга Соғлиқни сақлаш вазирлигининг Норматив-ҳуқуқий ҳужжатлар лойиҳалари муҳокамаси порталига жойлаштирилган “Электрон рецепт” тизимини босқичма-босқич жорий этиш тартибини ўз кучини йўқотган деб топиш тўғрисида”ги буйруқ лойиҳаси асос қилиб келтириляпти.
Вазирлик мазкур буйруқ лойиҳаси ижтимоий тармоқларда нотўғри талқин қилинаётганини билдирди.
Хабарга кўра, Соғлиқни сақлаш вазирлигининг 2025 йил 15 декабрдаги 25-сон буйруғида “Электрон рецепт” тизими асосида бериладиган дори воситаларининг рўйхати босқичма-босқич шакллантирилиши кўзда тутилган.
Яъни биринчи босқичда тизимли таъсирга эга антибиотиклар, синтетик антибактериал препаратлар ҳамда гормонал дори воситалари учун электрон рецепт мажбурий бўлиши белгиланган.
“ Янги буйруқ лойиҳасида эса Тошкент шаҳри ҳамда тажриба-синов лойиҳаси амалга оширилаётган 15 та туман (шаҳар)да жойлашган барча тиббиёт ташкилотлари ва дорихоналарда рецепт билан бериладиган дори воситалари электрон рецепт тизимига тўлиқ ўтказилиши назарда тутилмоқда (алоҳида тоифадаги кучли таъсир қилувчи моддалар, таркибида гиёҳвандлик воситалари ва психотроп моддалар сақловчи дори воситалари ҳамда реимбурсатсия дастури билан боғлиқ жараёнлар бундан мустасно)”, дейилади хабарда.
