Эрон 2026 йилги Жаҳон чемпионатида иштирок этади — FIFA
У халқаро футбол сиёсий кескинликлардан устун туриши кераклигини таъкидлади.
FIFA президенти Жанни Инфантино 2026 йил АҚШ, Канада ва Мексикада ўтказиладиган Жаҳон чемпионатида Эрон терма жамоаси иштироки борасидаги барча шубҳаларга нуқта қўйди, дея хабар бермоқда The Guardian.
Маълум қилинишича, Инфантино FIFA конгресси давомида қилган чиқишида Эрон мусобақада иштирок этишини ва ўз ўйинларини АҚШ ҳудудида ўтказишини қатъий тарзда тасдиқлади. Унинг таъкидлашича, халқаро футбол сиёсий кескинликлардан устун туриши керак.
“Эрон албатта Жаҳон чемпионатида иштирок этади ва АҚШда ўйнайди. Бизнинг вазифамиз — футбол орқали одамларни бирлаштириш,” деди FIFA президенти.
Шу билан бирга, Эрон футбол федерацияси делегациясининг Канада конгрессидаги иштироки билан боғлиқ ташкилий муаммолар қайд этилди. Айрим вакилларнинг кириш рухсатномалари бекор қилингани ёки рад этилгани ҳақида маълумотлар тарқалди. Канада томони хавфсизлик юзасидан ва айрим шахсларнинг Эрон инқилоби қўриқчилари корпуси билан боғлиқлик эҳтимоли сабаб текширув ўтказган.
Эрон терма жамоаси гуруҳ босқичида Янги Зеландия, Белгия ва Мисрга қарши майдонга тушиши режалаштирилган. Агар Эрон ва АҚШ ўз гуруҳларида иккинчи ўринни эгалласа, улар плей-офф босқичида ўзаро тўқнаш келиши мумкин.
АҚШ расмийлари эса айрим федерация вакиллари хавфсизлик текширувлари сабабли киришда қийинчиликка дуч келиши эҳтимолини инкор этмади. Хусусан, айрим шахсларнинг хавфсизликка оид алоқалари бўйича қўшимча текширувлар ўтказилиши мумкинлиги билдирилган.
Инфантино шунингдек FIFA чипталар савдосидаги рекорд кўрсаткичлар, турнирга бўлган юқори талаб ҳамда ташкилот даромадларининг сезиларли ўсиши ҳақида ҳам маълумот берди. Унинг сўзларига кўра, 2026 йилги Жаҳон чемпионатига бўлган талаб аввалги турнирларга нисбатан бир неча баробар юқори.
Конгресс якунида FIFA раҳбари амалдаги ваколат муддати тугагач, ташкилот президенти лавозимига яна номзодини қўйишини расман маълум қилди.
