Наманганда 24 майдан 12 июлгача 65-xалқаро гуллар фестивали ўтказилади
Фестиваль давомида Наманган 100 миллиондан ортиқ гул билан безатилади.
Наманган шаҳрида 24 майдан 12 июлга қадар анъанавий Халқаро гуллар фестивалининг 65-мавсуми бўлиб ўтади. Тадбир доирасида шаҳар кенг кўламли маданий, спорт ва туризм дастурлари билан меҳмонларни қабул қилади.
Ташкилотчилар маълумотига кўра, фестиваль давомида Наманган 100 миллиондан ортиқ гул билан безатилади. Бу эса шаҳарнинг туристик жозибасини янада ошириши кутилмоқда.
Дастурга мувофиқ, ҳар куни турли йўналишларда тадбирлар ўтказилади. Жумладан, жаҳон ва миллий эстрада юлдузлари иштирокида концертлар, Fashion Week доирасидаги мода намойишлари, халқаро ва маҳаллий спорт мусобақалари режалаштирилган.
Шунингдек, илмий-амалий конференциялар, семинарлар, театр спектакллари ва цирк томошалари, халқаро ҳунармандчилик кўргазмалари ҳам ўрин олган. Фестиваль дастуридан кулгу кечалари, гастрономик тадбирлар, хусусан “Дунё таомлари Наманганда” гастрономик туризм тадбирлари жой олган.
Бундан ташқари, “Лаванда сайли” ҳамда замонавий дрон-шоулар ташкил этилиши режалаштирилган.
Мутахассислар фикрича, фестиваль ҳудудда туризмни ривожлантириш, маданий алмашинувни кенгайтириш ва маҳаллий иқтисодий фаолликни оширишга хизмат қилади.
