Ҳусанов апрель ойида “Сити”нинг энг яхши футболчиси бўлмади
Мухлислар овоз бериш натижаларига кўра, ушбу соврин жамоа ҳимоячиси Нико O'Райлига насиб этди.
“Манчестер Сити” клуби апрель ойи якунларига кўра энг яхши футболчини эълон қилди. Мухлислар овоз бериш натижаларига кўра, ушбу соврин жамоа ҳимоячиси Нико O'Райлига насиб этди.
Клуб академияси тарбияланувчиси бўлган 21 ёшли футболчи ушбу номинация учун курашда ўзбекистонлик Абдуқодир Ҳусанов ва португалиялик Бернардо Силвани ортда қолдирди. Бу — O'Райлининг сўнгги уч ой ичида иккинчи бор ойнинг энг яхши ўйинчиси деб топилиши бўлди. У аввал ҳам февраль ойида ушбу эътирофга сазовор бўлган эди.
Клуб хабарида таъкидланишича, футболчи апрель ойида намоён этган юқори техник маҳорат, энергия ва тактик мослашувчанлик жамоа бош мураббийи Пеп Гуардиола қўл остидаги жамоанинг муваффақиятига салмоқли ҳисса қўшган. Жамоа ушбу даврда Англия Премер-лигаси ва мамлакат кубоги доирасидаги барча бешта учрашувда ғалаба қозонган.
Шунингдек, O'Райли гол уришда ҳам ўзини кўрсатди. У “Челси”га қарши сафар учрашувида (3:0) ҳисобни очган гол муаллифи бўлди.
Маълумот учун, Абдуқодир Ҳусанов бундан аввал 2025 йил февраль, 2026 йил январь ва март ойларида “Манчестер Сити”да ойнинг энг яхши футболчиси деб топилган эди.
