Ўзбекистонда энергетика тизими ташкил топганига 100 йил бўлди

Ўзбекистонда замонавий энергетика тизими ташкил топганининг 100 йиллиги муносабати билан соҳа ходимларига табрик йўлланди. Сана 1926 йил 1 май куни Бўзсув гидроэлектр станцияси ишга туширилгани билан боғлиқ бўлиб, айнан шу воқеа мамлакат энергетика тизимига асос солган тарихий босқич сифатида эътироф этилади.

 

Энергетика вазири Жўрабек Мирзамаҳмудов ўз табригида қайд этишича, дастлабки қуввати 2 мегаватт бўлган ушбу станция ўз даврида саноат ва шаҳар инфратузилмасини электр энергияси билан таъминлашда муҳим роль ўйнаган.

 

Таъкидланишича, ўтган  аср давомида соҳа жадал ривожланиб, янги электр станциялари барпо этилиб, мавжуд тармоқлар кенгайтирилди ҳамда инфратузилма изчил модернизация қилинган.

 

Сўнгги йилларда Шавкат Мирзиёев раҳбарлигида соҳага қаратилган эътибор натижасида кенг кўламли ишлар амалга оширилган.

 

Шунингдек, 2021–2025 йилларда умумий қуввати 5 582 мегаватт бўлган 15 та қуёш ва 5 та шамол электр станциялари фойдаланишга топширилди. Натижада, 2025 йилда қуёш ва шамол манбалари орқали 10,5 миллиард кВт⋅соат электр энергияси ишлаб чиқарилган бўлса, йил якунига бориб бу кўрсаткични 15 миллиард кВт⋅соатга етказиш режалаштирилган.

 

Бундан ташқари, умумий қуввати 8 минг мегаваттдан ортиқ замонавий иссиқлик электр станциялари ишга туширилган, гидроэлектр станциялар қуввати эса 2 400 мегаваттдан оширилган.

 

Қайд этилишича, жорий йил якунига қадар яна янги генерация қувватлари, подстанциялар ва минглаб километр электр тармоқларини ишга тушириш режалаштирилган.

 

Вазир ўз мурожаатида энергетика соҳаси ходимларининг фидокорона меҳнати ва касбий маҳорати келгусида ҳам тармоқнинг изчил ривожланишини таъминлашига ишонч билдирган.