Андижонда сохта прокуратура ходими пора олаётганда қўлга олинди
У ҳайдовчилик гувоҳномасига ўқитиш маркази ташкил этиш учун рухсатнома олиб беришни ваъда қилган.
Андижон вилоятининг Олтинкўл туманида ўзини прокуратура органлари ходими сифатида таништириб, фирибгарлик йўли билан пул талаб қилган шахс жиноят устида қўлга олинди. Бу ҳақда Бош прокуратура матбуот хизмати маълум қилди.
Қайд этилишича, туман Мактабгача ва мактаб таълими бўлимига қарашли 2-сон касб-ҳунар мактаби директори Х.Э. ҳуқуқни муҳофаза қилувчи органларга мурожаат қилган. У ўз аризасида туман фуқароси О. исмли шахс ўзини Андижон вилояти прокуратураси ходими сифатида таништирган А. исмли таниши орқали муассасада ҳайдовчилик гувоҳномасига ўқитиш маркази ташкил этиш учун рухсатнома олиб беришни ваъда қилганини билдирган.
Мазкур «хизмат» эвазига 10 минг АҚШ доллари талаб қилинган бўлиб, ушбу маблағнинг 4 минг доллари олаётган вақтида гумонланувчи ашёвий далиллар билан ушланган.
Шунингдек, гумонланувчи O.M. нинг аризасига асосан тезкор тадбирлар давом эттирилиб, фуқаро А.Ю. ҳам O.M.dan 4 минг АҚШ доллари олаётган вақтида қўлга олинган.
Дастлабки ўрганишларга кўра, А.Ю. давлат органларида, жумладан прокуратура тизимида ишламаслиги аниқланган. У олинган пулларни шахсий эҳтиёжлари учун сарфламоқчи бўлганини билдирган.
Мазкур ҳолат юзасидан Жиноят кодексининг 168-моддаси (фирибгарлик) ҳамда 28, 211-моддалари (пора бериш) асосида жиноят иши қўзғатилган.
Ҳозирда тергов ҳаракатлари давом эттирилмоқда.
