АҚШ Ғазодаги инсонпарварлик миссиясини ёпади

 

Қўшма Штатлар Исроилда жойлашган Фуқаролик-ҳарбий мувофиқлаштириш маркази (СМСС) фаолиятини тўхтатиш тўғрисида қарор қабул қилди. Мазкур марказ Исроил ва ҲАМАС ўртасидаги сулҳни мониторинг қилиш ҳамда Ғазога гуманитар ёрдам етказишни мувофиқлаштириш билан шуғулланган.

 

Бу ҳақда Reuters ахборот агентлиги манбаларга таяниб хабар бермоқда.

 

Маълумотларга кўра, қарор АҚШ президенти Доналд Трампнинг Яқин Шарқ бўйича тинчлик ташаббуси доирасидаги жараёнлар мураккаблашгани фонида қабул қилинган. Сулҳ келишувига қарамай Исроил томонидан ҳарбий ҳаракатларнинг давом этиши ҳамда ҲАМАС томонидан қуролсизланиш бўйича келишувларнинг бажарилмагани вазиятни мураккаблаштиргани қайд этилган.

 

Режага мувофиқ, СМСС функциялари АҚШ бошчилигидаги Халқаро барқарорлаштириш гуруҳи таркибига ўтказилади. Шу билан бирга, америкалик ҳарбий хизматчилар сони 190 нафардан 40 нафаргача қисқартирилади, уларнинг ўрнини эса бошқа давлатлардан келган фуқаролик мутахассислари эгаллаши режалаштирилмоқда. Марказнинг номи Халқаро Ғазони қўллаб-қувватлаш маркази сифатида ўзгартирилиши эҳтимоли ҳам қайд этилган.

 

Дипломатик манбалар қайта ташкил этиш жараёни мавжуд вазиятга сезиларли ўзгариш киритиши борасида шубҳа билдирмоқда.

 

Шунингдек, Ғазода сулҳ кучга кирганидан бери Ғазода 800 дан ортиқ фаластинликлар ва тўрт нафар Исроил аскари ҳалок бўлган, 2 миллион аҳоли эса оммавий равишда кўчишга мажбур бўлаётгани таъкидланган.

 

Аввалроқ The Guardian нашри манбаларга таяниб , Доналд Трамп маъмурияти Ғазо секторининг жанубида тахминан 140 гектар майдонни эгаллаган ҳарбий база қуришни режалаштираётгани ва бу база Халқаро барқарорлаштириш кучлари (ISF) учун операциялар маркази бўлиб хизмат қилишини хабар қилган эди.