АҚШ Кубага нисбатан куч ишлатиш эҳтимолини муҳокама қилмоқда — Politico
Бироқ ҳозирча асосий эътибор дипломатик босимга қаратилган.
Politico нашрининг хабар беришича, Трамп маъмурияти Куба ҳукуматига нисбатан куч ишлатиш эҳтимолини муҳокама қилмоқда, бироқ ҳозирча асосий устувор йўналиш сифатида дипломатик босим сақланиб қолмоқда.
Манбаларга кўра, Оқ уй ичида “кинетик куч” — яъни ҳарбий усулларни қўллаш варианти ҳам кўриб чиқилмоқда. Шунга қарамай, АҚШ маъмурияти Куба ҳукуматини иқтисодий ва сиёсий йўналишда ён беришга ундаш, жумладан давлат корхоналарини хусусийлаштириш, хорижий инвестицияларни жалб этиш ҳамда интернет инфратузилмасини кенгайтириш каби дипломатик механизмларга аҳамият бермоқда.
Нашрга кўра, Кубага нисбатан сиёсий босимда Флорида штатидаги кубалик-америкалик диаспора ҳам муҳим роль ўйнамоқда. Улар Трамп маъмуриятига Куба коммунистик тизимига нисбатан кескинроқ чоралар кўриш бўйича босим ўтказиб келмоқда.
Шу билан бирга, АҚШ расмийлари ҳозирги сиёсий ёндашувни “босим ва дипломатия уйғунлиги” сифатида баҳоламоқда ва вазиятнинг ривожланиши бўйича якуний қарор ҳали қабул қилинмаганини таъкидлашмоқда.
