Бойсунда сел оқибатида яна нефть аралаш суюқлик оқмоқда
Ҳодиса 2026 йил 2 май куни хандақ бузилиши оқибатида юз берган.
Бойсун туманида кучли сел оқибатида нефть аралаш суюқлик оқиб чиқиши қайд этилди. Бу ҳақда Ўзбекистон Экология ва иқлим ўзгариши миллий қўмитаси маълум қилди.
Маълумотларга кўра, ҳодиса 2026 йил 2 майда, тонгги соат 06:30 атрофида юз берган. Кучли сел оқими хандақни бузиб юборган, натижада нефть аралаш суюқлик ташқарига сизиб чиққан.
Ҳозирда воқеа жойида Сурхондарё вилояти Экология бош бошқармасининг Экополиция ходимлари ва бошқа тегишли ташкилотлар иштирокида ўрганиш ишлари олиб борилмоқда.
Қайд этилишича, ҳодиса сабабларини аниқлаш ва унинг оқибатларини баҳолаш юзасидан текширувларни давом эттирмоқда. Якуний натижаларга кўра қўшимча маълумот берилиши билдирилган.
Аввал ҳам Бойсун туманида нефть аралаш суюқликнинг дарёга оқиб кетгани оқибатида табиатга 8,5 миллиард сўмдан ортиқ зарар етказилгани маълум қилинганди.
Ҳодисага 23 апрель куни ҳудудда кузатилган кучли ёғингарчиликлар сабаб бўлган. Оқибатда тахминан 1,2 тонна нефть маҳсулотлари аралаш суюқлик Хонгаронсойга оқиб кетган.
