Чирчиқда юк вагони устига чиққан икки нафар ўқувчини ток урди
Болалар оғир куйиш жароҳатлари билан шифохонага ётқизилган.
Тошкент вилоятининг Чирчиқ шаҳрида юк вагони устига чиққан икки нафар вояга етмаган мактаб ўқувчиси ток уриши оқибатида оғир тан жароҳати олди. Бу ҳақда “Мillar” дастурида хабар берилди.
Маълум қилинишича, 27 апрель куни Чирчиқ темир йўл бекатининг Нурҳаёт—Қодирия йўналишида тўхтаб турган юк вагонлари устига чиққан 2011 ва 2014 йилларда туғилган ўқувчилар юқори кучланишли электр токи таъсирига тушган.
Ҳодисадан сўнг жабрланувчилар зудлик билан тез тиббий ёрдам орқали Тошкент шаҳридаги 16-сонли Республика шошилинч тиббий ёрдам илмий марказига олиб борилиб, жонлантириш бўлимига ётқизилган.
Тиббий хулосага кўра, уларга тана юзасининг 25–30 фоизини қамраб олган иккинчи ва учинчи даражали куйиш жароҳатлари ташхиси қўйилган. Ҳозирда беморларнинг аҳволи ўрта оғир деб баҳоланмоқда ва зарур муолажалар давом эттирилмоқда.
Мазкур ҳолат юзасидан Тошкент минтақаси темирйўл транспортида хавфсизликни таъминлаш бошқармаси томонидан терговга қадар текширув ишлари олиб борилмоқда.
Аввал ҳам Чирчиқ шаҳрида 17 ёшли ўсмирни поезд вагони устида ток уриб, оғир аҳволда шифохонага ётқизилгани ҳақида хабар берилганди. Ҳодисада йигит танасининг қарийб 80–85 фоизи куйган.
