Навоий вилоятида яна оғир ЙТҲ: икки киши ҳалок бўлди
Вилоятда сўнгги икки ойда ЙТҲлар сони ортиб, 11 нафар фуқаро вафот этган.
Навоий вилоятининг Конимех тумани ҳудудидан ўтувчи А-379 «Навоий–Учқудуқ» автомобиль йўлида йўл-транспорт ҳодисаси содир бўлди. Бу ҳақда вилоят Ички ишлар бошқармаси маълум қилди.
Дастлабки маълумотларга кўра, 2000 йилда туғилган Н.Ж. бошқарувида бўлган «Nexia-3» русумли автомобиль тезликни оширган ҳолда ҳаракатланиб, йўлнинг хавфли бурилиш қисмида бошқарувни йўқотган. Натижада автомобиль қарама-қарши йўналишга чиқиб кетиб, 1993 йилда туғилган M.A. бошқарувидаги “Scania 114L” юк машинаси билан тўқнашган.
ЙТҲ оқибатида «Nexia-3» ҳайдовчиси ва ундаги йўловчи олган оғир тан жароҳатлари сабабли воқеа жойида вафот этган. Яна бир йўловчи тан жароҳатлари билан шифохонага ётқизилган.
Ҳозирда мазкур ҳолат юзасидан жиноят иши қўзғатилиб, терговга қадар текширув ҳаракатлари олиб борилмоқда.
Аввалроқ ҳам Навои вилоятида Нехиа ҳайдовчиси қувиб ўтиш қоидаларини бузган ҳолда юк машинаси билан тўқнашиб, 4 нафар фуқаро ҳаётдан кўз юмган эди. Орадан 15 кун ўтиб эса Kia ва Chery русумли автомобиллар иштирокида содир бўлган ЙТҲ оқибатида 5 киши вафот этган эди.
