Президент Шавкат Мирзиёев Самарқандда Осиё тараққиёт банкининг йирик форумида иштирок этади

 

Ўзбекистон Президенти Шавкат Мирзиёев 3–4 май кунлари Самарқанд шаҳрида бўлиб ўтадиган Осиё тараққиёт банки Бошқарувчилар кенгашининг 59 йиллик йиғилиши тадбирларида иштирок этади.

 

Давлат раҳбари форумнинг очилиш маросимида нутқ сўзлайди ҳамда йиғилиш доирасида иштирокчи хорижий делегациялар раҳбарлари билан икки томонлама учрашувлар ўтказади.

 

Мазкур халқаро тадбирнинг асосий мавзуси “Тараққиёт чорраҳалари: минтақанинг ўзаро боғлиқ келажагини илгари суриш” бўлиб, у глобал ва минтақавий иқтисодиётнинг устувор йўналишларини муҳокама қилиш учун муҳим платформа вазифасини бажаради.

 

Йиғилишда «яшил» трансформация, энергетик ўтиш, рақамлаштириш, инвестицияларни жалб этиш, озиқ-овқат хавфсизлиги ҳамда етказиб бериш занжирларининг барқарорлигини таъминлаш каби долзарб масалалар муҳокама қилинади.

 

Тадбирда 100 дан ортиқ мамлакат делегациялари, халқаро молиявий институтлар — Осиё тараққиёт банки, Жаҳон банки, Халқаро валюта жамғармаси, Осиё инфратузилмавий инвестициялар банки вакиллари ҳамда хорижий ҳукуматларнинг 2 минг нафарга яқин вакиллари, шунингдек, йирик компаниялар, банклар ва экспертлар иштирок этиши кутилмоқда. Жами 4 мингдан ортиқ делегат қатнашиши кутилмоқда.

 

Ўзбекистон 1995 йилдан буён Осиё тараққиёт банкининг аъзоси бўлиб, унинг йирик ҳамкорларидан бири ҳисобланади. Мамлакат томонидан амалга оширилаётган лойиҳалар портфели ҳажми қарийб 16 миллиард долларни ташкил этади. Ўзбекистон ушбу нуфузли тадбирга иккинчи бор мезбонлик қилмоқда.