Самарқандда фахрий журналист билан учрашув ўтказилди
Муайяна Хўжаева бир қатор ОАВларда ишлаган бўлиб, Куба университетида ҳам фаолият юритган.
9 май — Хотира ва қадрлаш куни арафасида Самарқанд шаҳрида Ўзбекистон Журналистлар уюшмаси раиси вазифасини бажарувчи Шуҳрат Орипов ҳамда Уюшманинг вилоят бўлими раҳбари Акрам Ҳайдаров Ўзбекистонда хизмат кўрсатган журналист Муайяна Хўжаева хонадонида бўлди.
Ташриф давомида устоз журналист билан самимий суҳбат ташкил этилиб, унинг узоқ йиллик ижодий фаолияти ва ҳаёт йўли ҳақида фикр алмашилди.
Маълумот ўрнида, Муайяна Хўжаева ўз меҳнат фаолиятини 1963 йилда вилоят радиосида бошлаган. Кейинчалик у “Овози тожик” газетаси ҳамда Ўзбекистон телерадиокомпаниясида фаолият юритган.
Шунингдек, испан, инглиз ва араб тилларида эркин мулоқот қила олиши билан ажралиб туради. 1970–1972 йилларда Куба университетида ҳам фаолият олиб борган.
Унинг бой тажрибаси ва ижодий мероси бугунги ёш журналистлар учун муҳим ибрат мактаби экани таъкидланди.
Мулоқот давомида ўзбек журналистикаси ривожига улкан ҳисса қўшган марҳум журналистлар хотираси ёд этилди.
Шунингдек, соҳанинг янги авлодини тарбиялашда фахрий журналистлар тажрибасидан самарали фойдаланиш зарурлиги қайд этилди.
