АҚШ ва Исроил ҳужумлари оқибатида Эронда 4000 дан ортиқ тинч аҳоли ҳалок бўлган
Можаро давомида 100 мингдан ортиқ уй вайрон қилингани ва ўн минглаб одамлар жароҳат олган.
Абдул Мажид Ҳаким Илоҳи маълум қилишича, АҚШ ва Исроил томонидан Эронга қарши амалга оширилган ҳарбий ҳаракатлар оқибатида камида 4000 нафар тинч аҳоли ҳалок бўлган. Бу ҳақда у журналистларга берган баёнотида таъкидлаган.
Унинг сўзларига кўра, уруш давомида тинч аҳоли яшайдиган ҳудудларга ҳам зарбалар берилган. Натижада кенг кўламли вайронагарчилик юзага келиб, 100 мингдан ортиқ турар жой бинолари зарар кўрган ёки бутунлай вайрон бўлган. Шунингдек, 40 мингдан зиёд фуқаро турли даражадаги тан жароҳатлари олгани қайд этилган.
Вакилнинг билдиришича, ҳужумлар давомида ижтимоий ва муҳим инфратузилма объектлари ҳам жиддий талафот кўрган. Хусусан, 50 дан ортиқ шифохона ва 25 та олий таълим муассасасига зарар етказилган.
Бундан ташқари, айрим таълим муассасалари, жумладан, икки марта қизлар бошланғич мактабига ҳужум қилингани ва 175 нафар бола вафот этгани таъкидланган.
У шунингдек, кўприклар, жамоат жойлари, илмий лабораториялар ва бошқа муассасалар вайрон қилинганини, бу эса мамлакат инфратузилмасига сезиларли зарар етказганини қайд этган.
Эслатиб ўтамиз, мазкур ҳарбий қарама-қаршилик жорий йилнинг 28 февраль куни бошланган. АҚШ ва Исроил томонидан Эронга қарши зарбалар берилганидан сўнг, Эрон томони ҳам жавоб чораларини кўрган. Натижада минтақада кескинлик кучайиб, кенг кўламли ҳарбий тўқнашувлар юзага келган.
