Тошкент метросида йўловчи аёл релсга тушиб кетди
Машинистнинг тезкор ҳаракати сабабли жиддий оқибатларнинг олди олинган.
Тошкент метрополитенининг Ғафур Ғулом метро бекатида йўловчи аёл эҳтиётсизлик оқибатида поезд йўлига тушиб кетди. Бу ҳақда метрополитен матбуот хизмати хабар берди.
Маълум қилинишича, ҳодиса 2 май куни соат 21:35 атрофида содир бўлган. Бекатга 40-сонли ҳаракат таркиби кириб келаётган пайтда аёл эҳтиётсизлик билан релсга тушиб кетган.
Мазкур вазиятда машинист томонидан тезкор ва аниқ чоралар кўрилиб, поезд зудлик билан тўхтатилган ҳамда хавфсизлик талаблари тўлиқ таъминланган.
Дастлабки маълумотларга кўра, йўловчи жиддий тан жароҳати олмаган. У тез тиббий ёрдам ходимлари томонидан кўрик учун шифохонага олиб кетилган.
Қайд этилишича, ҳодиса метро қатнови жадвалига таъсир кўрсатмаган, поездлар белгиланган тартибда ҳаракатни давом эттирган.
