Коррупцияга қарши курашда ҳокимларнинг масъулияти оширилади
Энди ҳукумат аъзолари ва ҳокимликка номзодлар коррупцияга қарши аниқ режалар тақдим этишлари шарт бўлади.
Ўзбекистонда коррупцияга қарши кураш тизимини янада такомиллаштириш мақсадида жорий йил апрель ойида қабул қилинган ЎРҚ-1142-сонли қонун билан айрим қонун ҳужжатларига ўзгартириш ва қўшимчалар киритилди.
Мазкур ўзгартишларга мувофиқ, эндиликда ҳукумат аъзолари ҳамда ҳоким лавозимларига номзодлар коррупцияга қарши курашиш бўйича аниқ режаларни ишлаб чиқиб, тақдим этиши шарт бўлади. Бу тартиб “Маҳаллий ўзини ўзи бошқариш тўғрисида”, “Ўзбекистон Республикаси Олий Мажлиси Қонунчилик палатасининг Регламенти тўғрисида” ҳамда “Ўзбекистон Республикаси Вазирлар Маҳкамаси тўғрисида”ги қонунларда мустаҳкамлаб қўйилди.
Шунингдек, суд-ҳуқуқ тизимида ҳам бир қатор янгиликлар жорий этилди. Жумладан, фуқаролик ва иқтисодий ишларни соддалаштирилган тартибда кўриб чиқиш учун даъво миқдори сезиларли даражада оширилди. Эндиликда бу мезон юридик шахслар учун 150 БРВ, якка тартибдаги тадбиркорлар учун 100 БРВ ва жисмоний шахслар учун 50 БРВ этиб белгиланди.
Бундан ташқари, инвестиция шартномалари бўйича мажбуриятларни бажармаган субъектларга нисбатан судга мурожаат қилишда махсус иқтисодий ва саноат зоналари дирекциялари давлат божини тўлашдан озод этилди.
Мазкур ҳужжат Қонун ҳужжатлари миллий базасида эълон қилинган бўлиб, 2026 йил 1 майдан кучга кирди.
