Эрон Президенти БААга қилинган дрон ва ракета ҳужумларидан ғазабда — ОАВ
Масъуд Пезешкиён ва Ислом инқилоби қўриқчилари корпуси ўртасида жиддий қарама-қаршилик юзага келгани айтилмоқда.
Эрон президенти Масъуд Пезешкиён ва мамлакат ҳарбий раҳбарияти, хусусан Ислом инқилоби қўриқчилари корпуси (ИИҚК) ўртасида жиддий қарама-қаршилик юзага келгани айтилмоқда. Бу ҳақда Iran International нашри манбаларига таяниб маълум қилди.
Теҳрондаги муҳокамалардан хабардор манбаларга кўра, Пезешкиён Аҳмад Воҳидий бошчилигидаги ИИҚК ҳаракатларидан қаттиқ ғазабланганини билдирган. У БААга қарши ракета ва дрон ҳужумларини “мутлақо масъулиятсизлик” деб атаб, улар ҳукуматни огоҳлантирмасдан ва мувофиқлаштирилмаган ҳолда амалга оширилганини айтган.
Хабарларга кўра, Пезешкиён ИИҚКнинг минтақавий давлатларга қарши ёндашувини “телбалик” деб баҳолаб, бу қайтариб бўлмас оқибатларга олиб келиши мумкинлигидан огоҳлантирган.
Манбаларга кўра, президент вазиятни муҳокама қилиш учун Мужтабо Хоманаий билан фавқулодда учрашув ўтказишни сўраган. Ушбу учрашувда у ИИҚКнинг Форс кўрфази давлатларига қарши ҳаракатларини зудлик билан тўхтатиш ва кескинлашувни камайтириш чораларини кўришни талаб қилмоқчи.
Пезешкиён дипломатик ечимлар учун ҳали имконият борлигини таъкидлаб, қисқа муддат ичида музокараларга қайтиш зарурлигини билдирган. У халқаро воситачилар орқали мулоқотни тиклаш ташаббусини илгари суришни режалаштирмоқда.
Айни пайтда денгиз ҳудудидаги вазият юзасидан қарама-қарши баёнотлар берилмоқда. АҚШ расмийлари тижорат кемалари ҳаракати давом этаётганини ва вазият назорат остида эканини маълум қилган. ИИҚК эса буни рад этиб, “қоидабузар кемалар” тўхтатилишини билдирган.
АҚШ президенти Доналд Трамп сўнгги ҳодисаларни кенг кўламли тўқнашув сифатида баҳоламаган ва сулҳ расман бузилганини эълон қилмаган.
Таҳлилчилар Эрон ичидаги сиёсий ва ҳарбий қарашлар ўртасидаги тафовут тобора чуқурлашиб бораётганини айтмоқда. Бу эса давлат бошқарувида бўлинишни кучайтириб, мамлакатни кенгроқ ҳарбий можаро хавфига олиб келиши мумкин.
Президентга яқин манбалар унинг халқаро жавоблардан жиддий хавотирда эканини билдирган. Пезешкиён Эрон янги кенг кўламли урушни кўтара олмаслигини ва давом этаётган ҳарбий ҳаракатлар АҚШ томонидан иқтисодий ва энергетика инфратузилмаларига зарба берилишига олиб келиши мумкинлигини қайд этган.
