Фарғонада 16 нафар ҳоким ёрдамчиси жавобгарликка тортилди
Улар тадбиркорларнинг кредит ажратиш билан боғлиқ мурожаатларига белгиланган тартибда хулоса бермаган.
Фарғона вилоятида тадбиркорларнинг кредит олиш билан боғлиқ мурожаатларини кўриб чиқишда қонунбузилишларга йўл қўйган 16 нафар ҳоким ёрдамчиси маъмурий жавобгарликка тортилди. Бу ҳақда Бизнес-омбудсман томонидан маълум қилинди.
Қайд этилишича, online-mahalla.uz платформаси орқали келиб тушган мурожаатлар таҳлили давомида вилоятда 34 та ҳолатда ҳоким ёрдамчилари тадбиркорларнинг кредит ажратиш бўйича аризаларига белгиланган тартибда хулоса бермагани аниқланган.
Амалдаги тартибга кўра, Вазирлар Маҳкамасининг 2022 йил 8 июлдаги 373-сон қарори билан тасдиқланган низомга мувофиқ, ҳоким ёрдамчиси ариза асосида жойига чиқиб ўрганиш ўтказиши, натижалар бўйича фотоҳисобот тайёрлаши ҳамда 5 иш куни ичида кредит ажратиш ёки рад этиш юзасидан хулосани ягона электрон платформага жойлаштириши лозим.
Таҳлиллар якунига кўра, ушбу талабларни бажармаган 16 нафар мансабдор шахсга нисбатан маъмурий чоралар кўрилган. Шунингдек, тадбиркорларга кредит олиш бўйича зарур хулосалар берилиши таъминланган.
