Испания хавфли вирус тарқалган круиз кемасининг Канар оролларига киришига рухсат берди

Испания ҳукумати Ғарбий Африкадаги Капа Верде яқинида тўхтаб турган ва бортида ҳантавирус тарқалган MV Hondius круиз кемасининг Канар оролларига йўл олишига рухсат берди. Бу ҳақда Al Jazeera хабар берди.

 

Испания Соғлиқни сақлаш вазирлиги маълум қилишича, Жаҳон соғлиқни сақлаш ташкилоти тавсиясига асосан Капа Верде  147 нафар йўловчи ва экипаж аъзоларини қабул қилиш имконига эга эмас. Шу сабабли зарур тиббий инфратузилмага эга энг яқин ҳудуд сифатида Канар ороллари танланган.

 

Аввал хабар берилганидек, апрель ойида кема бортида юзага келган касаллик оқибатида Нидерландиялик эр-хотин ва Германия фуқароси вафот этган. Яна икки экипаж аъзоси оғир аҳволда бўлиб, шошилинч тиббий ёрдамга муҳтож. Эвакуация қилинган Буюк Британия фуқароси эса Жанубий Африкада жонлантириш бўлимида даволанмоқда.

 

Кема оператори — Oceanwide Expeditions маълумотига кўра, яна бир йўловчида касаллик аломатлари енгил кечмоқда.

 

Испания Соғлиқни сақлаш вазирлиги эвакуация қилиниши зарур бўлган беморлар кемадан туширилгач, кема Канар оролларига йўл олишини билдирди. Сафар тахминан уч кун давом этади ва кема Гран-Канария ёки Тенерифе портига кириши кутилмоқда.

 

Канар оролларига етиб келгач, барча йўловчилар ва экипаж аъзолари тиббий кўрикдан ўтказилиб, зарур даволаш ишлари олиб борилади ҳамда улар ўз мамлакатларига қайтарилади. Жараён Европа касалликларнинг олдини олиш ва назорат қилиш маркази ва ЖССТ билан ҳамкорликда ташкил этилади.

 

ЖССТ маълумотларига кўра, 1 апрель куни Аргентинанинг Ушуаиа шаҳридан йўлга чиққан кемада 23 мамлакатдан 88 йўловчи ва 59 экипаж аъзоси бўлган. 

 

Мутахассислар эҳтимолий юқиш манбаи сифатида кемадан олдинги сафар ёки оролларда амалга оширилган табиат кузатув саёҳатларини кўрсатмоқда.

 

ЖССТ вакили Мариа Ван Керкҳовенинг таъкидлашича, камдан-кам ҳолларда яқин алоқадаги шахслар ўртасида вирус юқиши эҳтимоли мавжуд. Шу билан бирга, ташкилот кенг жамоатчилик учун хавф даражаси паст эканини билдирган.

 

Ҳантавирус одатда кемирувчилар орқали юқади ва унинг инкубация даври 1 ҳафтадан 6 ҳафтагача давом этади. Мутахассислар қайд этишича, дастлабки беморлар вирусни кема бортидан ташқарида юқтирган бўлиши мумкин.

 

Расмийлар барча санитария ва хавфсизлик чораларига қатъий риоя қилинишини, беморлар алоҳида шароитларда даволанишини ва маҳаллий аҳоли билан бевосита алоқа чекланишини маълум қилган.