Навоийда 13 нафар боғча боласини олиб кетаётган Matiz ЙТҲга учради
Ҳодиса оқибатида боғча раҳбари бўлган ҳайдовчи аёл вафот этган, бир бола кома ҳолатида, 8 нафар бола шифохонага олиб кетилган.
Навоий вилоятининг Нурота туманида боғча болалари бўлган Matiz ЙТҲга учради Бу ҳақда Кun.uz хабар берди.
Маълум қилинишича, ЙТҲ 5 май куни эрталаб содир бўлган. Тумандаги оилавий боғчалардан бирининг раҳбари бўлган 34 ёшли аёл 13 нафар тарбияланувчи ва ўзининг 3 ойлик чақалоғини Matiz машинасига миндириб ташиган.
Аёл болаларни яшаш хонадонларидан боғчага олиб кетаётган бўлган. У ҳаракат пайтида бошқарувни йўқотган ва машина йўлдан чиқиб кетиб, ағдарилган. ЙТҲ оқибатида аёл вафот этган, болалар эса турли даражада тан жароҳатлари олган. Айни вақтда бир бола кома ҳолатида, 8 нафари эса вилоят марказидаги шифохонага олиб кетилгани айтилмоқда.
Хабарга кўра, эр-хотин ҳайдовчилик гувоҳномаси бўлмаган ҳолда йиллар давомида машина бошқариб келган. Болалар доимий равишда шу ҳолда уйдан боғчага ва боғчадан уйга ташилган. Ҳатто ота-оналар ҳам бунга эътироз билдирмаган.
Аввал ҳам Навоийда ҳайдовчилик гувоҳномаси ҳам, автомобилни бошқариш ҳуқуқи ҳам бўлмаган шахс маст ҳолда 23 нафар болани Damas'да ташигани аниқланган.
