Шимолий Корея конституциясидан Жанубий Корея билан бирлашиш ҳақидаги нормалар олиб ташланди

 

Шимолий Корея (КХДР) ўз конституциясига муҳим ўзгартиришлар киритди. Янгиланган Асосий қонундан Жанубий Корея билан бирлашиш ҳақидаги барча нормалар чиқариб ташланди. Бу ҳақда Reuters хабар берди.

 

Янги таҳрирга кўра, мамлакат ҳудуди энди шимолда Хитой ва Россия, жанубда эса Корея билан чегарадош сифатида белгиланган. Шу билан бирга, Жанубий Корея ҳужжатда алоҳида “душман давлат” сифатида қайд этилган.

 

Маълумотларга кўра, мазкур ўзгартиришлар КХДР Олий Халқ Ассамблеяси томонидан март ойида қабул қилинган. Бу ҳақда Сеулдаги экспертлар томонидан расман маълум қилинган.

 

Янгиланган конституцияда давлат раҳбари мақоми ҳам қайта белгиланган. Ким Чен Ин эндиликда Давлат ишлари бўйича комиссия раиси ва расмий давлат раҳбари сифатида кўрсатилган. Аввал у “олий раҳбар” сифатида тилга олинарди.

 

Ҳужжатда КХДР ядровий қуролга эга давлат сифатида яна бир бор тасдиқланиб, ядровий кучлар устидан тўлиқ бошқарув ваколати давлат раҳбарига юклатилгани белгиланган. Шунингдек, мамлакат ўзини “глобал тинчликни таъминлаш учун ҳаракат қилувчи масъулиятли ядровий давлат” сифатида таърифлаган.

 

Мазкур конституциявий ўзгаришлар Корея ярим оролини қайта бирлаштириш ғоясидан расмий воз кечилганини англатади.