Ўзбекистон Президенти Сербия ташқи ишлар вазири Марко Журични қабул қилди
Учрашувда 2025 йилги келишувларни амалга ошириш бўйича йўналишлар белгиланди.
Президент Шавкат Мирзиёев 6 май куни Ўзбекистонга ташриф билан келган Марко Журични қабул қилди.
Учрашув аввалида юқори мартабали меҳмон Александр Вучичнинг саломи ва эзгу тилакларини етказди.
Суҳбат чоғида Ўзбекистон ва Сербия ўртасидаги кўп қиррали ҳамкорликни янада ривожлантириш, 2025 йил октябрь ойида олий даражада эришилган келишувларни амалиётга татбиқ этиш масалалари муҳокама қилинди.
Томонлар ҳукуматлар, парламентлар ва ишбилармон доиралар ўртасидаги мулоқот фаоллашганини мамнуният билан қайд этди.
Иқтисодий ҳамкорлик доирасида товар айирбошлаш ҳажмини ошириш, машинасозлик, фармацевтика, кимё саноати, IТ, қишлоқ хўжалиги ва туризм соҳаларида қўшма лойиҳаларни кенгайтириш масалалари кўриб чиқилди.
Шунингдек, жорий йилда Белград шаҳрида Ҳукуматлараро комиссиянинг биринчи йиғилишини ўтказиш бўйича келишувга эришилди.
Учрашувда меҳнат миграцияси, маданий-гуманитар ва таълим соҳаларидаги ҳамкорликни ривожлантириш масалалари ҳам муҳокама қилинди.
