Тошкентда маст эркак йўл ўртасига чиқиб, ҳаракатга тўсқинлик қилди
Жамоат тартибини бузган шахсга нисбатан баённома расмийлаштирилди.
Ижтимоий тармоқларда тарқалган видеолавҳа юзасидан Тошкент шаҳрида тегишли ҳуқуқий чоралар кўрилди.
Тошкент шаҳар Ички ишлар бош бошқармаси маълумотига кўра, 8 май куни соат 02:35 ларда Олмазор тумани, ТХАЙ кўчасида 2001 йилда туғилган С.О. маст ҳолатда йўл қатнов қисмига чиқиб, транспорт воситаларининг эркин ҳаракатланишига тўсқинлик қилган.
Мазкур ҳолат жамоат жойида юриш-туриш қоидаларини қасддан бузиш сифатида баҳоланиб, унга нисбатан Маъмурий жавобгарлик тўғрисидаги кодекси 183-моддаси (майда безорилик) аломатлари билан маъмурий баённома расмийлаштирилган.
Тўпланган ҳужжатлар белгиланган тартибда кўриб чиқиш учун жиноят ишлари бўйича туман судига тақдим этилди.
