Эроннинг ҳарбий салоҳиятини тиклашига 20 йил керак бўлади — Трамп
АҚШ президентининг таъкидлашича Эрон бўйича режалаштирилган нишонларнинг 70 фоизига зарба берилган.
АҚШ президенти Дональд Трамп Эроннинг ҳарбий салоҳиятини тиклаш учун узоқ вақт талаб этилишини маълум қилди. Унга кўра, Эроннинг мавжуд ҳарбий инфратузилмаси ва имкониятларини қайта тиклаши учун тахминан 20 йил керак бўлиши мумкин.
Америка етакчиси “Full Measure” дастурига берган интервьюсида АҚШ томонидан режалаштирилган ҳарбий нишонларнинг қарийб 70 фоизига зарба берилганини қайд этган.
Шу билан бирга, The Washington Post нашри аввалроқ АҚШ Марказий разведка бошқармаси (CIA) таҳлилларига таяниб, Эрон урушдан олдинги баллистик ракета арсеналининг тахминан 70 фоизини сақлаб қолганини маълум қилган эди.
Ҳисоботда айтилишича, Эрон ер остидаги айрим ракета арсеналларига киришни тиклаш, шикастланган ракеталарни таъмирлаш ҳамда янги ракеталар ишлаб чиқаришни давом эттириш имконига эга бўлган.
