БАА Эронга яширин ҳужумлар уюштирган — WSJ
АҚШ БААнинг урушга киришини норасмий тарзда маъқуллаган бўлиши мумкин.
Бирлашган Араб Амирликлари АҚШ ва Исроил ўртасидаги уруш фонида Эронга қарши бир қатор яширин ҳужумлар уюштиргани ҳақида хабар берилди. Бу ҳақда Anadolu агентлиги The Wall Street Journal мақоласига таяниб хабар берди.
Хабарга кўра, ҳужумлардан бири Эроннинг Лаван оролида жойлашган нефтни қайта ишлаш заводига қаратилган бўлиб, у апрель ойи бошида зарбага учраган. Ўша вақтда АҚШ президенти Доналд Трамп Эрон билан ўт очишни тўхтатиш бўйича келишув эълон қилиши кутилаётган эди. Зарба оқибатида йирик ёнғин юз берган ва объект вақтинча ишдан чиққан.
Манбаларнинг билдиришича, Эрон мазкур ҳужумга жавобан БАА ва Қувайт ҳудудларига баллистик ракеталар ҳамда дронлар йўллаган. Шунингдек, АҚШ БААнинг урушга киришини норасмий тарзда маъқуллаган бўлиши мумкинлиги ҳам қайд этилган.
WSJ маълумотига кўра, Эрон минтақада энг кўп айнан БААни нишонга олган давлат бўлиб, Форс кўрфази мамлакатига 2 800 дан ортиқ ракета ва дрон ҳужумлари амалга оширилган.
Ушбу ҳужумлар БАА иқтисодиётига сезиларли зарар етказиб, айрим соҳаларда қисқартириш ва мажбурий таътил ҳолатларига сабаб бўлган. Бу эса мамлакатнинг стратегик қарашларида ўзгаришларга олиб келгани айтилади.
Аноним Форс кўрфази расмийлари фикрича, БАА эндиликда Эронни минтақавий барқарорликка таҳдид солувчи “хавфли актёр” сифатида баҳоламоқда.
БАА Ташқи ишлар вазирлиги мазкур иддаолар юзасидан изоҳ бермаган, бироқ аввалги баёнотларга ишора қилиб, мамлакат ўзига қилинган ҳар қандай душманона ҳаракатга жавоб бериш ҳуқуқига эга эканини таъкидлаган.
Яқин Шарқ бўйича таҳлилчи Дина Эсфандиёрий эса WSJ'га берган изоҳида, Форс кўрфази давлатларидан бири урушаётган томон сифатида Эронга тўғридан-тўғри зарба бергани муҳим воқеа эканини қайд этган.
Унинг фикрича, бу ҳолат Теҳронни БАА ва минтақадаги бошқа воситачи давлатлар ўртасида келишмовчилик келтириб чиқаришга ундаши мумкин.
