Бахтиёр Саидов Эрон ташқи ишлар вазири Аббос Ароқчи билан телефон орқали мулоқот қилди
Томонлар икки давлат ўртасидаги анъанавий дўстлик ва амалий ҳамкорликни кенгайтириш масалаларини кўриб чиқди.
Ўзбекистон ташқи ишлар вазири Бахтиёр Саидов Эрон Ислом Республикаси ташқи ишлар вазири Саййид Аббос Ароқчи билан телефон орқали мулоқот ўтказди.
Суҳбат давомида томонлар минтақавий хавфсизлик ва долзарб халқаро масалалар юзасидан фикр алмашди. Барча масалаларни халқаро ҳуқуқ нормаларига мувофиқ сиёсий-дипломатик йўл билан ҳал этиш муҳимлиги алоҳида таъкидланди.
Шунингдек, Ўзбекистон ва Эрон ўртасидаги анъанавий дўстлик ва ўзаро ҳурматга асосланган муносабатларни янада мустаҳкамлаш, савдо-иқтисодий, транспорт-логистика ҳамда бошқа ўзаро манфаатли йўналишлардаги ҳамкорлик истиқболлари муҳокама қилинди.
Томонлар икки мамлакат ташқи ишлар вазирликлари ўртасидаги яқин мулоқот ва амалий ҳамкорликни изчил давом эттиришга тайёр эканликларини билдирди.
