Қирғизистонда эркак хотинига қайноқ сув сепиб, Ўзбекистонга қочиб кетди
Аёл 27 кун касалхонада даволанган, эри ва унинг қариндошлари томонидан ёрдам кўрсатилмаган.
Қирғизистоннинг Ош шаҳрида оилавий зўравонлик билан боғлиқ ҳолат юзасидан тергов олиб борилмоқда. Бу ҳақда 24.kg нашри хабар берди.
Маълум қилинишича, Зарнибо исмли аёл шаҳар раҳбарияти билан учрашувда эри томонидан зўравонликка учраганини билдирган. Унинг сўзларига кўра, 9 март куни турмуш ўртоғи юзига икки маротаба қайноқ сув сепган ва шундан сўнг Ўзбекистонга қочиб кетган.
Жабрланувчи ҳужум оқибатида 27 кун давомида шифохонада даволанганини маълум қилган. Аёлнинг таъкидлашича, ушбу даврда эри ҳамда унинг қариндошлари томонидан ҳеч қандай ёрдам кўрсатилмаган.
“Мен тўрт нафар фарзандим билан ёлғиз қолдим. Касалхонага ҳеч ким келмади, ёрдам ҳам бўлмади”, — деган аёл йиғилиш давомида.
Унинг айтишича, ҳолат юзасидан ҳуқуқни муҳофаза қилувчи органларга мурожаат қилинган бўлсада, гумондор ҳали Қирғизистонга қайтарилмаган.
Шаҳар ички ишлар бошқармаси раҳбари мазкур вазият назоратга олинганини билдириб, гумондорни қўлга олиш ва мамлакатга қайтариш бўйича чоралар кўрилаётганини маълум қилган.
Қирғизистон Ички ишлар вазирлиги маълумотига кўра, 2025 йилнинг дастлабки тўққиз ойида мамлакатда 16 мингдан ортиқ оилавий зўравонлик ҳолати қайд этилган. Бош прокуратура эса маиший зўравонлик билан боғлиқ 656 та жиноят иши қўзғатилганини билдирган.
