Мамлакатлар ҳантавирусга қарши тайёр туриши керак — ЖССТ
Ҳозирда 9 та тасдиқланган инфекция ҳолати қайд этилган, 3 киши вафот этган.
Жаҳон соғлиқни сақлаш ташкилоти (ЖССТ) раҳбари Тедрос Адҳаном Гебреесус мамлакатларни ҳантавирус инфекциясининг янги ҳолатларига тайёр туришга чақирди. Бу ҳақда The Guardian хабар берди.
Унинг маълум қилишича, МВ Ҳондиус круиз кемасида қайд этилган авж олишдан сўнг ҳозиргача 9 та лаборатория тасдиқланган ҳолат аниқланган, улардан 3 таси ўлим билан якунланган.
ЖССТ бош директори сўзларига кўра, ҳозирча кенг миқёсли эпидемия белгиларига оид далиллар мавжуд эмас. Бироқ вируснинг 6–8 ҳафтагача давом этиши мумкин бўлган узоқ инкубация даври сабабли, янги ҳолатлар қайд этилиши эҳтимоли сақланиб қолмоқда.
Тедрос Адҳаном Гебреесус мамлакатларга ЖССТ тавсияларига қатъий риоя қилиш, жумладан 42 кунлик кузатув ва юқтирган шахслар билан алоқада бўлганларни доимий мониторинг қилиш зарурлигини таъкидлаган.
Шунингдек, у Испания ҳукумати ва тегишли хизматларга тезкор эвакуация ва мувофиқлаштирилган чора-тадбирлар учун миннатдорлик билдирган.
ЖССТга кўра, ҳантавирус одатда кемирувчилар орқали юқади ва одамдан одамга юқиши кам учрайди. Вируснинг Андес штамми билан боғлиқ 9 та ҳолат тасдиқланган.
