Олмалиқда ЙТҲ оқибатида 9 ёшли бола вафот этди
26 ёшли ҳайдовчи пиёдалар ўтиш жойидан йўлни кесиб ўтаётган икки нафар болани уриб юборган.
Тошкент вилоятининг Олмалиқ шаҳрида икки нафар вояга етмаган бола иштирокида йўл-транспорт ҳодисаси содир бўлди. Бу ҳақда вилоят Йўл ҳаракати хавфсизлиги бошқармаси ахборот хизмати маълум қилди.
Қайд этилишича, ҳодиса 12 май куни соат 14:00 атрофида Олмалиқ шаҳрининг Амир Темур кўчасида юз берган. 26 ёшли ҳайдовчи С.Д. бошқарувидаги автомобиль пиёдалар ўтиш жойидан йўлни кесиб ўтаётган икки нафар 9 ёшли болани уриб юборган.
Ҳодиса оқибатида жабрланган болалардан бири оғир тан жароҳатлари олиб, шифохонада вафот этган. Иккинчи бола эса тан жароҳатлари билан касалхонага ётқизилган.
Мазкур ҳолат юзасидан Олмалиқ шаҳар Ички ишлар бошқармаси томонидан жиноят иши қўзғатилган. Ҳайдовчи мазкур ишга жалб қилинган ҳолда тергов ҳаракатлари олиб борилмоқда.
