Президент Шавкат Мирзиёев Бразилия ТИВ раҳбарини қабул қилди
Учрашувда икки давлат ўртасидаги сиёсий, иқтисодий ва тармоқ ҳамкорлигини янги босқичга олиб чиқиш, қўшма лойиҳаларни кенгайтириш ҳамда Ҳукуматлараро комиссия тузиш масалалари кўриб чиқилди.
Президент Шавкат Мирзиёев 12 май куни Ўзбекистонга ташриф билан келган Бразилия Федератив Республикаси ташқи ишлар вазири Мауро Виейрани қабул қилди.
Учрашув аввалида меҳмон Ўзбекистон раҳбарига Бразилия Президенти Луис Инациу Лула да Силванинг самимий саломи ва эзгу тилакларини етказди.
Суҳбат давомида Ўзбекистон ва Бразилия ўртасидаги муносабатларни янада мустаҳкамлаш ҳамда кўп қиррали ҳамкорликни сифат жиҳатидан янги босқичга олиб чиқиш масалалари муҳокама қилинди.
Олий даражадаги тизимли сиёсий мулоқотни йўлга қўйиш, парламентлараро алоқаларни фаоллаштириш ва икки томонлама ҳамкорлик механизмларини кенгайтириш муҳимлиги таъкидланди.
Томонлар савдо-иқтисодий алоқаларни ривожлантириш, ўзаро савдо ҳажмини ошириш ҳамда кимё, электротехника, фармацевтика ва саноатнинг бошқа йўналишларида қўшма лойиҳаларни амалга ошириш масалаларига алоҳида эътибор қаратдилар.
Шунингдек, қишлоқ хўжалиги, селекция, туризм, спорт ва бошқа истиқболли соҳаларда ҳамкорликни кенгайтириш имкониятлари кўриб чиқилди.
Учрашув якунида Ҳукуматлараро комиссия ташкил этиш таклифи қўллаб-қувватланди.
Томонлар халқаро ва минтақавий долзарб масалалар юзасидан ҳам фикр алмашдилар ҳамда бўлажак ҳамкорлик тадбирлари режасини муҳокама қилдилар.
