Ўзбекистонда Озиқ-овқат маҳсулотлари хавфсизлиги қўмитаси ташкил этилди — Азизбек Урунов янги қўмита раиси этиб тайинланди
Шунингдек, Ветеринария ва чорвачилик тизимида ҳам янги ўзгаришлар амалга оширилди.
Ўзбекистон Президентининг тегишли қарорига мувофиқ, Озиқ-овқат маҳсулотлари хавфсизлиги қўмитаси ташкил этилди.
Қарорга кўра, Ўзбекистон Президентининг Жаҳон савдо ташкилоти бўйича вакили Азизбек Аллаберганович Урунов ушбу қўмитага ўриндошлик асосида раис этиб тайинланди.
Шунингдек, Президент Администрациясида фаолият юритиб келган Фуроқат Жалилов ҳамда Элёр Талабоев янги ташкил этилган қўмита раисининг ўринбосарлари лавозимига тайинланди.
Қишлоқ хўжалиги тизимини такомиллаштириш доирасида Ветеринария ва чорвачилик қўмитаси қайта ташкил этилиб, Чорвачилик ва яйлов хўжалигини ривожлантириш агентлиги сифатида фаолият юритиши белгиланди.
Мазкур агентликка 2020 йилдан буён Микрокредитбанкни бошқариб келган Ориф Бўтаев раҳбар этиб тайинланди. У бир вақтнинг ўзида Қишлоқ хўжалиги вазири ўринбосари лавозимини ҳам эгаллайди.
Қарор доирасида яйлов хўжалигини ривожлантириш, маҳаллий аҳолини қўллаб-қувватлаш ҳамда чорвачилик учун жамоат яйловларини яратишга алоҳида эътибор қаратилиши белгиланган.
