Жиззах ва Сурхондарё вилояти ҳокимларига янги ўринбосарлар тайинланди
Дилмурод Худайшукуров Жиззах вилояти ҳокими ўринбосари, Ойбек Ашуров эса Сурхондарё вилояти ҳокими ўринбосари бўлди.
Жиззах ва Сурхондарё вилоятларида ҳокимларнинг ёшлар сиёсати,ижтимоий ривожлантириш ва маънавий-маърифий ишлар бўйича ўринбосарлари лавозимига янги тайинловлар амалга оширилди.
Жиззах вилояти ҳокимлигида ўтказилган йиғилишда ташкилий масала кўрилди. Унда Худайшукуров Дилмурод Холмуродович Жиззах вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимига тайинланди.
Қайд этилишича, у мазкур тайинловга қадар Жиззах вилояти ҳокимлиги ташкилий-кадрлар гуруҳи раҳбари лавозимида фаолият юритган.
Шунингдек, Ойбек Ашуров Сурхондарё вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимига тасдиқланди.
Ойбек Ашуров 1988 йилда Шеробод туманида туғилган. У 2011 йилда Ўзбекистон Республикаси Ички ишлар вазирлиги академиясини тамомлаган бўлиб, мутахассислиги ҳуқуқшунослик йўналишига ихтисослашган. Меҳнат фаолияти давомида Шеробод ва Шўрчи туманлари ҳокимликларида турли лавозимларда, жумладан ҳоким ўринбосари сифатида ишлаган.
Шунингдек, Сурхондарё вилояти ҳокимлиги ижро назорати бўлими бошлиғи лавозимида ҳам фаолият юритган. Мазкур лавозимга қадар у Сурхондарё вилояти ҳокимлиги ижро аппарати раҳбари сифатида фаолият юритиб келган.
Маълумот учун, Сурхондарё вилояти ҳокимининг аввалги ўринбосари Илҳом Сапаров Жарқўрғон тумани ҳокими этиб тайинланган.
Абдуллаева Шахризода
