Қашқадарёда экологияга зарар етказган корхонага қарийб 11 миллиард сўм компенсация белгиланди

Қашқадарёдаги Муборак газни қайта ишлаш заводига экологик қонунбузарликлар сабаб қарийб 11 миллиард сўм қўшимча компенсация белгиланди. Бу ҳақда Экология ва иқлим ўзгариши миллий қўмитаси хабар берди.

 

Маълум қилинишича, завод ҳудудида қурилиш ва бошқа турдаги чиқиндилар ноқонуний жойлаштирилган. Бу эса атроф-муҳитга салбий таъсир кўрсатиб, чиқиндилардан ҳосил бўлаётган чанг зарралари атмосфера ҳавосининг ифлосланишига сабаб бўлаётгани қайд этилган.

 

Шунингдек, зарарли газларни ёқиш жараёнида атмосфера ҳавосига олтингугурт, углерод ва азот оксидлари белгиланган меъёрлардан ортиқ миқдорда чиқарилгани аниқланган.

 

Ишлаб чиқариш жараёнида газни тозалашдан ҳосил бўлган оқова сувлар нефть маҳсулотлари аралашган ҳолда очиқ майдонларга ташланаётганлиги маълум бўлди.

 

Ҳолат юзасидан корхонага 10 миллиард 834 миллион сўм миқдорида қўшимча компенсация белгиланди ҳамда бажарилиши мажбурий бўлган 7 банддан иборат кўрсатма берилди. Тўпланган ҳужжатлар судга юборилган.

 

Аввалроқ Сурхондарёнинг Бойсун туманида 23 апрель куни дарёга нефть аралаш суюқлик оқиб кетгани ҳақида хабар берилганди. Ҳодиса Surxan Gas Chemical Operating Company МЧЖ қўшма корхонасига қарашли қудуқда юз бергани аниқланган. 2 май куни кучли сел сабаб хандақ бузилиши оқибатида яна нефть аралаш суюқлик сизиб чиқди.

 

Ҳолат юзасидан атроф-муҳитга етказилган зарар миқдорини аниқлаш, сабаб ва омилларни ўрганиш ҳамда масъул субъект, жумладан Surxan Gas Chemical Operating Company фаолиятига ҳуқуқий баҳо бериш бўйича текширув ишлари олиб борилаётгани маълум қилинганди.