Ермакда 4 та дипломатик паспорт ва яшириниш учун маблағ бор — прокуратура
Украина Президенти офиси собиқ раҳбарининг тергов ва суддан яшириниб қолиш хавфи мавжудлиги маълум қилинди.
Украина Ихтисослаштирилган коррупцияга қарши прокуратураси (САП) Президент офисининг собиқ раҳбари Андрей Ермакнинг тергов ва суддан яшириниб қолиш хавфи мавжудлигини маълум қилди. Бу ҳақда Интерфакс хабар берди.
Айблов томонига кўра, Ермак хорижда яшириниб юриш учун етарли молиявий ресурс ва алоқаларга эга. Прокурор судда Ермак буюртмаси билан қурилган резиденция унинг расмий даромадлари ҳисобидан эмас, ўз маблағлари ҳисобидан молиялаштирилганини қайд этган.
Шунингдек, прокуратура вакили Ермакда хорижга чиқиш паспорти ва тўртта дипломатик паспорт мавжудлигини билдирган. Таъкидланишича, у қарийб олти йил давомида Президент офиси раҳбари лавозимида ишлагани сабабли Украина ичида ҳам, хорижда ҳам кенг алоқаларга эга.
Прокуратура фикрича, Ермак ушбу алоқалари орқали давлат чегарасини тўсиқларсиз кесиб ўтиши ва хорижда яшириниб юришига кўмак олиши мумкин.
Бундан ташқари, айблов томони иш учун муҳим бўлган ҳужжат ва ашёлар йўқ қилиниши хавфи мавжудлигини ҳам маълум қилган. Прокурор сўзларига кўра, Ермак эҳтимолий жиноятни содир этишда конспирация усулларидан фойдаланган ҳамда айрим ташкилий масалаларни ишончли шахсларга топширган.
Судда, шунингдек, объектларга ташрифлар вақтида анонимликни таъминлаш чоралари кўрилгани, мессенжерлардаги ёзишмаларда ҳақиқий исм ишлатилмагани ҳам айтиб ўтилган.
Айблов томони Ермакнинг алоқалари гувоҳлар ва ишга алоқадор бошқа шахсларга таъсир ўтказиш имконини беришини ҳам билдирган. Хусусан, гап у билан алоқада бўлган ҳуқуқни муҳофаза қилувчи органлар вакиллари ҳақида кетмоқда.
Прокуратура маълумотига кўра, суд экспертига босим ва таҳдидлар бўлган. Шунингдек, тергов давомида давлат реестрлари ҳамда тизимларидан Ермак ва унинг мулкига оид айрим маълумотлар ўчириб ташлангани аниқланган.
Эслатиб ўтамиз, аввалроқ Украина коррупцияга қарши идоралари Президент администрациясининг собиқ раҳбари Андрей Ермакни йирик коррупция ва пул ювиш иши бўйича гумонланувчи сифатида эълон қилганди. У Киев яқинидаги элита тураржой мажмуаси орқали 10,5 миллион доллар маблағни легаллаштириш билан боғлиқ схемада иштирок этганликда гумон қилинмоқда. Ермак айбловларни изоҳлар экан, мазкур мажмуада кўчмас мулкка эгалик қилмаслигини билдирган.
