Президент Шавкат Мирзиёев БМТ Бош котиби ўринбосари билан учрашув ўтказди
Учрашувда репродуктив саломатлик, гендер тенглик ва демографик барқарорлик соҳаларидаги лойиҳаларни кенгайтириш масалаларига алоҳида эътибор қаратилди.
Президент Шавкат Мирзиёев 13 май куни Ўзбекистонга расмий ташриф билан келган Бирлашган Миллатлар Ташкилоти Бош котибининг ўринбосари, Аҳолишунослик жамғармаси (UNFPA) ижрочи директори Диене Кейтани қабул қилди.
Учрашув аввалида меҳмон давлат раҳбарига БМТ Бош котиби Антониу Гутерришнинг самимий саломлари ва эзгу тилакларини етказди.
Суҳбат давомида Ўзбекистон ва UNFPA ўртасидаги ҳамкорликнинг бугунги ҳолати ҳамда уни янада ривожлантириш истиқболлари муҳокама қилинди.
Кейинги йилларда томонлар ўртасидаги ҳамкорлик сифат жиҳатидан янги босқичга кўтарилгани таъкидланди. Хусусан, репродуктив саломатликни мустаҳкамлаш, гендер тенгликни таъминлаш, демографик барқарорликни қўллаб-қувватлаш йўналишларида муҳим лойиҳалар амалга оширилмоқда. Жамғарма мамлакат тарихидаги биринчи аҳоли ва қишлоқ хўжалигини рўйхатга олиш жараёнида ҳам фаол иштирок этди.
Шунингдек, она ва бола саломатлигини яхшилаш, ёш оилаларни қўллаб-қувватлаш ҳамда хотин-қизларнинг ҳуқуқ ва имкониятларини кенгайтириш борасида эришилган натижалар алоҳида қайд этилди.
Учрашув якунида ҳамкорликни янада кенгайтириш, янги қўшма ташаббусларни амалга ошириш ҳамда Ўзбекистонда ва халқаро майдонда юқори даражадаги тадбирларни ташкил этиш бўйича келишувга эришилди.
