Россияда қурилишдаги бахтсиз ҳодисада ўзбекистонлик ишчи ҳалок бўлди
Минорали кран искала конструкциясига зарар етказганидан сўнг икки ўзбекистонлик ишчи 7-қаватдан йиқилиб тушиб бири ҳалок бўлган, яна бири оғир тан жароҳатлари олган.
Бурятия Республикасида қурилиш майдончасида содир бўлган бахтсиз ҳодиса оқибатида Ўзбекистон фуқароларидан бири ҳалок бўлди, яна бири оғир тан жароҳатлари олди.
Ўзбекистоннинг Новосибирск шаҳридаги Бош консуллиги маълумотига кўра, ҳодиса Жорий йилнинг 8 май куни Улан-Уде шаҳрида қурилаётган кўп қаватли турар-жой биносида юз берган.
Дастлабки маълумотларга кўра, минорали кран оператори эҳтиётсизлик оқибатида искала конструкциясига зарар етказган. Натижада хавфсизлик камарларисиз ишлаётган Ўзбекистоннинг икки нафар фуқароси бинонинг 7-қаватидан йиқилиб тушган.
Жабрланувчилардан бири оғир жароҳатлар билан шифохонага ётқизилган. Иккинчи фуқаро эса олган тан жароҳатлари оқибатида воқеа жойида вафот этган.
Мазкур ҳолат юзасидан Бурятия ҳуқуқни муҳофаза қилувчи органлари томонидан Россия Федерацияси Жиноят кодексининг 217-моддаси 2-қисми билан жиноят иши қўзғатилган.
Маълум қилинишича, Ўзбекистоннинг Новосибирскдаги Бош консуллиги Миграция агентлигининг ҳудудий ваколатхонаси билан ҳамкорликда марҳумнинг жасадини ватанга юбориш чораларини кўрмоқда.
