Ўзбекистонда “SOCAR” компаниясининг ваколатхонаси очилади
Президент Шавкат Мирзиёев “SOCAR” ва “Бритиш Петролеум” компаниялари раҳбарияти билан энергетика ва нефть-газ соҳасидаги ҳамкорликни ривожлантириш режаларини муҳокама қилди.
Президент Шавкат Мирзиёев 13 май куни “Ўзбекистон энергетика ҳафталиги – 2026” форумида иштирок этиш учун Ўзбекистонга ташриф буюрган SOCAR бош директори Равшан Нажаф ҳамда British Petroleum компанияси раҳбарияти вакиллари Ариел Флорес ва Жованни Кристофолини қабул қилди.
Учрашувда энергетика ва нефть-газ соҳасида дунёнинг етакчи компаниялари ҳисобланган “SOCAR” ҳамда “British Petroleum” билан ўзаро манфаатли ҳамкорликни янада кенгайтириш истиқболлари муҳокама қилинди.
Мулоқот давомида энергетика соҳасидаги ҳамкорлик изчил ривожланаётгани мамнуният билан қайд этилди. Хусусан, “SOCAR” компанияси Устюрт платосидаги углеводород конларини ўзлаштириш лойиҳасида Ўзбекистоннинг муҳим шерикларидан бири экани таъкидланди. Шу билан бирга, компаниянинг Ўзбекистондаги ваколатхонасини очиш тўғрисида қарор қабул қилингани маълум қилинди.
Мазкур йирик лойиҳага “British Petroleum” компаниясининг қўшилгани юқори баҳоланди.
Томонлар углеводород хомашёсини қидириш ва қазиб олиш, уни чуқур қайта ишлаш, нефть ва нефть маҳсулотларини узоқ муддатли етказиб беришни йўлга қўйиш ҳамда тармоқ учун малакали мутахассислар тайёрлаш бўйича қўшма лойиҳаларни илгари суриш масалаларига алоҳида эътибор қаратдилар.
Учрашув давомида Равшан Нажаф давлат раҳбарига 2027 йилда Ўзбекистон ва Озарбайжонда ёшлар ўртасидаги U-20 жаҳон чемпионатини ўтказишга тайёргарлик кўриш жараёнидаги кўмак учун миннатдорлик билдирди.
