Бир ойда 855 минг доза наркотик ва 410 минг дона психотроп восита мусодара қилинди
Апрел ойида ўтказилган тезкор тадбирлар давомида 23 та уюшган жиноий гуруҳ фаолиятига чек қўйилди.
Ҳуқуқ-тартибот органларининг тезкор бўлинмалари ҳамкорлигида апрел ойида уюшган наркожиноятчилик ҳамда уюшган жиноий гуруҳларга қарши кенг кўламли тезкор тадбирлар амалга оширилди.
Ўтказилган операциялар натижасида наркотик моддаларни ноқонуний тарқатиш билан шуғулланган 13 та уюшган нарко-жиноий гуруҳ фаолиятига чек қўйилган. Тезкор тадбирлар давомида 2 нафар гуруҳ етакчиси ва 35 нафар аъзоси қўлга олинган.
Шунингдек, 4 та яширин нарколаборатория ҳамда 1 та интернет орқали фаолият юритган наркодо‘кон фош этилган. Халқаро ҳамкорлик доирасида назорат остида етказиб бериш бўйича махсус операция ҳам ўтказилган.
Тезкор тадбирлар давомида 285 килограмм анъанавий наркотик моддалар, 410 минг дона психотроп дори воситалари ҳамда 42 литр ноқонуний прекурсорлар мусодара қилинган.
Мутахассислар хулосасига кўра, ушбу жиноий тармоқлар фаолияти давом этганида бир йил ичида 2,6 миллион дона психотроп восита, 1,4 тонна “гашиш” ва “опий”, шунингдек, катта миқдордаги синтетик наркотиклар ноқонуний муомалага чиқарилиши мумкин эди.
Уюшган гуруҳий жиноятчиликка қарши кураш йўналишида ҳам йирик натижаларга эришилган. Хусусан, 10 та жиноий гуруҳ фаолиятига барҳам берилиб, 10 нафар етакчи ва 50 нафар аъзо қўлга олинган. Мазкур гуруҳлар 17 та шаҳар ва туманда тадбиркорларга босим ўтказиш, талончилик, безорилик, ўғрилик ҳамда оғир тан жароҳати етказиш каби жиноятларни содир этиб келган.
Бундан ташқари, тезкор тадбирлар доирасида Тожикистон Республикаси ҳуқуқни муҳофаза қилувчи органлари билан ҳамкорликда халқаро операция ҳам амалга оширилган.
