Маданий мерос миллий рўйхатига киритилган объектлар сони 67 тага ошди

Ўзбекистон Республикаси Вазирлар Маҳкамасининг 2026 йил 12 майдаги 239-сон қарорига мувофиқ, Ҳукуматнинг 2019 йил 4 октябрдаги “Моддий маданий мероснинг кўчмас мулк объектлари миллий рўйхатини тасдиқлаш тўғрисида”ги 846-сон қарорига тегишли ўзгартириш ва қўшимчалар киритилди. 

 

Қайд этилишича, мазкур қарор мамлакат ҳудудидаги моддий маданий мерос объектларини муҳофаза қилиш тизимини янада такомиллаштириш, уларнинг тарихий-маданий  асраб-авайлаш ҳамда давлат ҳимоясини кучайтиришга қаратилган.

 

 

Қарорга асосан, Андижон, Бухоро, Фарғона, Жиззах, Навоий, Наманган, Самарқанд, Сурхондарё, Сирдарё вилоятлари, Тошкент шаҳри, Тошкент вилояти ҳамда Қорақалпоғистон Республикасида жойлашган археологик ёдгорликлар, тарихий ва меъморий иншоотлар, монументал санъат объектлари ҳамда диққатга сазовор масканларнинг миллий рўйхати қайта кўриб чиқилди. Натижада бир қатор янги объектлар давлат муҳофазасига олиниб, уларга маданий мерос мақоми берилди.

 

 

Шунингдек, айрим объектларнинг баланс сақловчилари, фойдаланиш ҳуқуқи ҳамда муҳофаза ҳудудларига оид маълумотлар ҳам янгиланди. Бу эса маданий мерос объектларини асраш, улардан оқилона фойдаланиш ва келажак авлодларга етказиш борасидаги масъулиятни янада оширишга хизмат қилади.

 

 

Қарорга мувофиқ, Маданий мерос агентлигига манфаатдор вазирлик ва идоралар билан ҳамкорликда объектларни белгиланган тартибда давлат кадастрига киритиб бориш вазифаси юклатилди. Шу билан бирга, моддий маданий мерос объектларини хатловдан ўтказиш, уларнинг техник ҳолатини мониторинг қилиш ҳамда давлат муҳофазасини мустаҳкамлаш ишлари изчил давом эттирилади.

 

Маълумот ўрнида, шу кунгача миллий рўйхатга киритилган 8370 та маданий мерос объекти давлат муҳофазасига олинган эди. Янги тасдиқланган қарорга асосан яна 67 та янги объект рўйхатга қўшилиб, муҳофазадаги объектлар сони 8437 тага етди.