Эрон айрим Хитой кемаларига Ҳурмуз бўғозидан ўтишга рухсат берди
Маълумотларга кўра, чоршанба кунидан буён Ҳурмуз бўғозидан 30 та кема ўтган.
Эрон 28 февралдан буён кучайтирилган назорат остида бўлган Ҳурмуз бўғози орқали айрим Хитой кемаларининг ҳаракатланишига рухсат берди. Бу ҳақда Sinxua ахборот агентлиги маълум қилди.
Қайд этилишича, чоршанба кунидан бошлаб бир қатор Хитой кемалари Эрон томонидан белгиланган назорат протоколларига мувофиқ бўғоздан ўтишни бошлаган.
Эрон Ислом инқилоби қўриқчилари корпуси денгиз флоти вакилига кўра, шу вақт давомида Ҳурмуз бўғозидан 30 та кема ўтган.
Эслатиб ўтамиз, Эрон 28 февралдан бошлаб Исроил ва АҚШ билан боғлиқ кемаларга нисбатан чекловларни кучайтирган эди. Теҳрон бу қарорни ўз ҳудудига қилинган қўшма ҳужумлардан кейин қабул қилганини билдирган.
Эрон ташқи ишлар вазири Сайид Аббос Ароқчи бўғоз барча тижорат кемалари учун очиқ эканини, бироқ кемалар Эрон денгиз кучлари билан ҳамкорлик қилиши лозимлигини таъкидлаган.
Шунингдек, у Эрон юк ташишга тўсқинлик қилмаётганини, аксинча минтақадаги блокада АҚШ томонидан амалга оширилаётганини қайд этган. Вазир вазият дипломатик йўл билан ҳал этилишига умид билдирган.
