Эрон футболчилари учун АҚШ визалари ҳалигача берилмаяпти

2026 йилги футбол бўйича Жаҳон чемпионати бошланишига бир ойдан кам вақт қолганига қарамай, Эрон терма жамоаси футболчилари учун АҚШ визалари ҳали расмийлаштирилмаган. Бу ҳақда Эрон футбол федерацияси президенти Меҳди Тож маълум қилди, дея хабар бермоқда Аl Jazeera.

 

IRNA давлат агентлиги хабарига кўра, федерация раҳбари яқин кунларда FIFA билан виза масаласи юзасидан ҳал қилувчи музокаралар ўтказилишини билдирган.

 

“Эртага ёки индинга FIFA билан ҳал қилувчи учрашув ўтказамиз. Улар бизга кафолат бериши керак, чунки виза масаласи ҳануз ҳал бўлгани йўқ”, — деган Меҳди Тож.

 

Унинг айтишича, ҳозиргача Эрон делегациясининг бирор аъзосига АҚШ визаси берилгани ҳақида расмий маълумот келмаган.

 

Маълумотларга кўра, футболчилар виза олиш жараёнининг бир қисми сифатида Туркия пойтахти Анқарага бориб, бармоқ изи топшириши керак. Шу билан бирга, Эрон футбол федерацияси ушбу жараённи Анталия шаҳрида ташкил этишга уринмоқда. Чунки АҚШ ва Эрон 1980 йилдан буён дипломатик муносабатларга эга эмас.

 

Бундан ташқари, АҚШ ва Исроилнинг 28 февраль куни Эронга қарши бошлаган ҳарбий ҳужумлари ортидан минтақадаги вазият янада кескинлашган эди. Ҳозирда томонлар ўртасида 8 апрелдан буён "мўрт" сулҳ сақланиб қолмоқда.

 

Чоршанба куни Теҳронда Эрон терма жамоасини Жаҳон чемпионатига кузатиш маросими ўтказилди. АҚШ, Мексика ва Канада мезбонлик қиладиган мундиал давомида Эрон жамоаси Аризона штатининг Туксон шаҳрида жойлашади.

 

 Эрон терма жамоаси турнирдаги илк учрашувини 15 июнь куни Лос-Анжелесда Янги Зеландия терма жамоасига қарши ўтказади. G гуруҳи доирасида эронлик футболчилар Белгия ва Миср терма жамоаларига қарши ҳам майдонга тушади.