Фарғонада тоға ва жиян наркосавдогарлар қўлга олинди
Тезкор тадбирда жами 5 кг гашиш олинган бўлиб, мазкур моддалар қўшни давлатдан олиб кирилган.
Фарғонада қарийб 5 кг гашиш айланмасига чек қўйилди. Бу ҳақда Zamon.uz'га ДХХ маълум қилди.
Маълум қилинишича, Қўқон шаҳрида яшовчи, 2002 йилда туғилган фуқаро бошқарувида бўлган “Кобальт” русумли автомашина Учкўприк тумани ҳудудида текширилган.
Натижада, унинг салонида 4 кг 41 гр “гашиш” моддаси борлиги маълум бўлди. Шунингдек, мазкур фуқаронинг уйидан ҳам 867 гр “гашиш” моддаси олинди.
Терговга қадар текширув давомида, ушбу гиёҳвандлик воситалари унинг 1980 йилда туғилган тоғасига тегишли эканлиги аниқланиб, у ҳам қўлга олинди.
Аниқланишича, ушбу гиёҳванд модда қўшни республикадан олиб келинган.
Ҳозирда мазкур шахсларга нисбатан Жиноят Кодексининг 246-моддаси (контрабанда) ва 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш...) билан жиноят иши қўзғатилиб, “қамоқ” эҳтиёт чораси қўлланилди. Тергов ҳаракатлари олиб борилмоқда.
