“Кичик йўлда 120 км/соат тезликда ҳаракатланган” — Хоразмда ИИБ ходими иштирокидаги ЙТҲда бир киши вафот этди
Маст ҳайдовчи бошқарувни йўқотиб, автомобиль йўл четидаги бетон тўсиққа урилган ва ағдарилган.
Хоразм вилояти Шовот туманида маст ҳолатда транспорт воситасини бошқарган ички ишлар органлари ходими иштирокида йўл-транспорт ҳодисаси содир бўлди.
Kun.uz маълумотларига кўра, 2025 йил 23 декабрь куни Урганч шаҳар ИИБ ЖХХ ҲПБ профилактика катта бўлмаган инспектори сифатида ишлаган 30 ёшли Д.Ю. спиртли ичимлик истеъмол қилганидан сўнг “Cobalt” русумли автомашинани бошқарган. У билан бирга автомобилда икки нафар йўловчи бўлган.
Ҳаракат давомида ҳайдовчи бошқарувни йўқотиб, автомобиль йўл четидаги бетон тўсиққа урилган ва ағдарилган. Оқибатда орқа ўриндиқда бўлган йўловчи оғир тан жароҳати олиб, шифохонада вафот этган.
Суд материалларида гувоҳнинг кўрсатмасига кўра, автомобиль кичик йўлда 120 км/соат тезликда ҳаракатланган ва бир неча йўл нотекисликларидан сўнг ҳам тезликни камайтирмаган.
Суд мажлисида айбланувчи ўз айбига тўлиқ иқрорлик билдирган ва қилмишидан пушаймонлигини таъкидлаган.
ЖИБ Шовот туман суди ҳукмига кўра, Д.Ю. Жиноят кодексининг 266-моддаси 2-қисми билан айбли деб топилиб, унга 4 йил озодликдан маҳрум этиш жазоси тайинланган. Шунингдек, у 3 йил муддатга транспорт воситаларини бошқариш ҳуқуқидан маҳрум қилинди. Жазони манзил колонияларда ўташ белгиланган.
