Бухорода Медиа ҳафталик якунланди: 800 дан ортиқ иштирокчи қамраб олинди
Медиа ҳафталик 18–22 май кунлари мамлакатнинг водий ҳудудларида давом этиши режалаштирилган.
Бухорода ўтказилган медиа ҳафталик якунига кўра, иштирокчилар ўз профессионал позициясини шакллантириш, аудиторияни тўғри таҳлил қилиш ҳамда тезкорлик ва аниқликни уйғунлаштириш бўйича амалий билим ва кўникмаларга эга бўлдилар.
Тадбир давомида контент яратишда креатив ёндашувни ривожлантириш, трендларни кузатиш билан чекланмасдан уларни яратиш тамойиллари асосий йўналиш сифатида белгиланди. Шунингдек, сунъий интеллект имкониятлари контент ишлаб чиқариш жараёнида ёрдамчи восита эмас, балки ижодий жараённи кучайтирувчи муҳим омил сифатида амалий синовдан ўтказилди.
Иштирокчилар томонидан контент сифати унинг ташқи кўринишидан кўра, ортидаги фикр, ёндашув ва профессионал позиция билан баҳоланиши алоҳида таъкидланди.
Маълумотларга кўра, медиа ҳафталик доирасида 53 нафар матбуот котиби ва ахборот хизмати ходими, 19 нафар телевидение соҳаси вакили, 15 та газета ва интернет ОАВ вакили, 14 нафар блогер, 80 дан ортиқ мобилограф, 80 дан ортиқ СММ мутахассиси ҳамда 200 нафар ёш контент яратувчи қамраб олинди. Якуний медиа форумда эса 700 дан ортиқ иштирокчи жамланди. Умумий ҳисобда тадбир 800 дан ортиқ иштирокчини қамраб олди.
Медиа ҳафталик 18–22 май кунлари мамлакатнинг водий ҳудудларида давом этиши режалаштирилган бўлиб, кейинги босқичда Фарғона ва Наманган вилоятлари параллель равишда янги ғоялар ва медиа-инновациялар майдонига айланади.
