Метрода рекорд кўрсаткич: 8 май куни 1 млндан ортиқ йўловчи ташилди
Метро хизматларидан энг кўп ҳафтанинг пайшанба ва жума кунлари фойдаланилмоқда.

2026 йил май ойида Тошкент метрополитени хизматларидан фойдаланувчилар сони ўтган йилнинг шу даврига нисбатан сезиларли даражада ошди. Бу ҳақда “Тошкент метрополитени” ДУК хабар берди.
Mаълумотларга кўра, 2025 йил 8 май куни метродан 986 минг 916 нафар йўловчи фойдаланган бўлса, 2026 йил 7 май куни бу кўрсаткич 1 миллион 105 минг 883 нафарга етган. Натижада йўловчилар оқими қарийб 12 фоизга ошган.
Шунингдек, 2025 йил 15 май куни метро хизматидан 953 минг 220 нафар фуқаро фойдаланган бўлса, 2026 йил 14 май куни ушбу кўрсаткич 1 миллион 44 минг 736 нафарга етиб, 9,6 фоизлик ўсиш қайд этилган.
Метрополитенга кўра, 2026 йил 8 май куни бир сутка давомида 1 миллион 117 минг 61 нафар йўловчига хизмат кўрсатилиб, рекорд натижа қайд этилган.
Қайд этилишича, метро хизматларидан энг кўп ҳафтанинг пайшанба ва жума кунлари фойдаланилмоқда.








