Олмалиқда мотоцикл вояга етмаган пиёдани уриб кетди
ЙТҲ оқибатида пиёданинг оёғи жуда жиддий шикастлангани айтилмоқда.
Тошкент вилоятининг Олмалиқ шаҳрида мотоцикл иштирокида йўл-транспорт ҳодисаси содир бўлди. Бу ҳақда вилоят ИИБ ЙҲХБ хабар берди.
Маълум қилинишича, ҳодиса 14 май куни соат тахминан 23:00 ларда А.Темур кўчасида юз берган. 2003 йилда туғилган ҳайдовчи C.Ф. мотоцикл бошқариб кетаётган вақтда йўлни пиёдалар учун белгиланмаган жойдан кесиб ўтаётган 2011 йилда туғилган пиёдани уриб юборган.
Оқибатда пиёда турли тан жароҳатлари олиб, шифохонага ётқизилган.
Тарқалган видеоларда эса унинг ўнг оёғи тиззага яқин қисми ва чап товон суяги узилиб кетгани кўринади. Лекин расмий идора бунга аниқлик киритмаган.
Ҳолат юзасидан Олмалиқ шаҳар ИИБ томонидан суриштирув ишлари олиб борилмоқда.
12 май куни ҳам айнан шу кўчада 26 ёшли ҳайдовчи С .Д. бошқарувидаги автомобиль пиёдалар ўтиш жойидан йўлни кесиб ўтаётган икки нафар 9 ёшли болани уриб юборганди. Ҳодиса оқибатида жабрланган болалардан бири оғир тан жароҳатлари олиб, шифохонада вафот этган. Иккинчи бола эса тан жароҳатлари билан касалхонага ётқизилган.
