Канадада хантавирус инфекцияси ҳолати қайд этилди
Россия ва Беларусда ҳам касаллик билан боғлиқ ҳолатлар аниқланган.
Канаданинг Британия Колумбияси провинцияси ҳукумати мамлакат фуқароларидан бирида хантавирус инфекцияси аниқланганини маълум қилди. Reuters агентлиги хабарига кўра, беморда Andes вируси штамми бўйича тест натижаси ижобий чиққан.
Маълум қилинишича, фуқаро аввалроқ хантавирус тарқалиши қайд этилган круиз кемасида бўлган. Кема тарк этилгач, эркак Британия Колумбиясининг Виктория шаҳридаги шифохонада тиббий кўрикдан ўтказилган.
Россия Фанлар академияси академиги, эпидемиолог Геннадий Онишченко маълумотига кўра, 2026-йили Атлантика океанидаги круиз кемасида қайд этилган ҳолатдан аввал ҳам бир қатор давлатларда хантавирус инфекцияси аниқланган.
Хусусан, Россиянинг Волгабўйи ҳудуди ва Бошқирдистонида касаллик ҳолатлари қайд этилган. Шунингдек, АҚШнинг Аризона ва Калифорния штатларида, Чили ҳамда Аргентинада ҳам хантавирус билан боғлиқ тасдиқланган ҳолатлар аниқланган. Беларусда эса ўтган йил давомида 50 та ҳолат қайд этилгани маълум қилинган.
